ଜଟଣୀ ତ୍ରୟୋବିଂଶ ପୁସ୍ତକମେଳା ୨୦୨୫ ପାଇଁ ସାମ୍ବାଦିକ ସମ୍ମିଳନୀ ।

ଜଟଣୀ, “ଆମ ଓଡ଼ିଶା ଖବର” ୩୦ ନଭେମ୍ବର ଅପରାହ୍ନରେ ସାମ୍ବାଦିକ ସମ୍ମିଳନୀର ଆୟୋଜନ ହୋଇଥିଲା। ସାମ୍ବାଦିକ ସମ୍ମିଳନୀର ଉଦ୍ଦେଶ୍ଯ ଥିଲା, ଆସନ୍ତା ଡିସେମ୍ବର ମାସ ୭ ତାରିଖଠାରୁ ପୁସ୍ତକ ମେଳା ଆରମ୍ଭ ହୋଇ ୧୩ ତାରିଖ ପର୍ଯ୍ୟନ୍ତ ସାତଦିନ ବ୍ୟାପୀ ସ୍ଥାନୀୟ ଟାଉନହଲ୍ (ସ୍ରଷ୍ଟା) ଠାରେ ଅନୁଷ୍ଠିତ ହେବାକୁ ଯାଉଛି। ସେହି ଉପଲକ୍ଷେ ପୁସ୍ତକମେଳା କମିଟି ତରଫରୁ ସ୍ଥାନୀୟ ସ୍ୱସ୍ତିଜୋତି ସ୍କୁଲ ପରିସରରେ ସାମ୍ବାଦିକ ସମ୍ମିଳନୀର ଆୟୋଜନ କରାଯାଇଥିଲା। ଏହି ସମ୍ମିଳନୀରେ ପୁସ୍ତକମେଳା କମିଟିର କର୍ମକର୍ତ୍ତା ଜବାହାରଲାଲ ସୁବୁଦ୍ଧି, ଅକ୍ଷୟକୁମାର ମହାନ୍ତି, ଶିଶି ରଥ, ସୁଶାନ୍ତ ରାଉତ, କ୍ଷୀରୋଦକୁମାର ନନ୍ଦ, ଆଦିନାରାୟଣ ଖଣ୍ଡୁଆଳ, କିଶୋର ପାଇକରାୟ, ଭବାନୀଶଙ୍କର ମହାପାତ୍ର, ପଦ୍ମନାଭ ପାଣିଗ୍ରାହୀ ପ୍ରମୁଖ ଉପସ୍ଥିତ ଥିଲେ। ବିଭିନ୍ନ ଖବରକାଗଜ ଓ ବୈଦ୍ୟୁତିକ ଗଣମାଧ୍ୟମର ସ୍ଥାନୀୟ ପ୍ରତିନିଧି ଯୋଗ ଦେଇଥିଲେ। ସମିତିର ସୂଚନାନୁସାରେ ସାତଦିନ ବ୍ୟାପୀ ଉକ୍ତ କାର୍ଯ୍ୟକ୍ରମରେ ସାହିତ୍ୟ ସଭା, ଭଞ୍ଜସାହିତ୍ୟ ଆଲୋଚନା, ସାଂସ୍କୃତିକ କାର୍ଯ୍ୟକ୍ରମ, କବିତା ପାଠୋତ୍ସବ, ବିଦ୍ୟାଳୟରେ ଅଧ୍ୟୟନରତ ବିଦ୍ୟାର୍ଥୀ ଏବଂ ଗୃହିଣୀମାନଙ୍କ ମଧ୍ୟରେ ନାନା ପ୍ରତିଯୋଗିତାର ଆୟୋଜନ କରାଯାଇଛି। ଆଲୋଚନା ସଭାରେ ପ୍ରତିଷ୍ଠିତ ବ୍ୟକ୍ତିତ୍ଵ, ବିଦ୍ଵାନ, ସୁବକ୍ତା ଯୋଗଦେବାର ପ୍ରତିଶ୍ରୁତି ପ୍ରଦାନ କରିଛନ୍ତି । ଏତଦ୍ ବ୍ୟତୀତ ବିଭିନ୍ନ କ୍ଷେତ୍ରରେ ପାରଦର୍ଶିତା ଲାଭ କରିଥିବା ବ୍ୟକ୍ତି ବିଶେଷଙ୍କୁ ସମ୍ବଦ୍ଧିତ କରାଯିବା ସହ ପ୍ରତିଯୋଗିତାରେ କୃତିତ୍ଵ ଅର୍ଜନ କରିଥିବା ବିଦ୍ୟାର୍ଥୀ ଓ ଗୃହିଣୀଙ୍କୁ ପୁରସ୍କାର ପ୍ରଦାନ କରାଯିବ । ଜଟଣୀବାସୀ ଏବଂ ତତ୍ ସନ୍ନିକଟ ଅଞ୍ଚଳର ପୁସ୍ତକପ୍ରେମୀ ରିହାତି ମୂଲ୍ୟରେ ମନପସନ୍ଦର ପୁସ୍ତକ କ୍ରୟ କରିବାର ସୁଯୋଗ ନେବା ସହ ବିଭିନ୍ନ ଦିବସରେ ଆୟୋଜିତ ସଭାରେ ଉପସ୍ଥିତ ରହି ମେଳାକୁ ସଫଳ କରିବା ନିମନ୍ତେ ଆୟୋଜକଗଣ ନିନେଦନ କରିଅଛନ୍ତି।

ଖୋର୍ଦ୍ଧା ଜଟଣୀରୁ ଧିରେନ ପ୍ରତିହାରିଙ୍କ ରିପୋର୍ଟ।