ମୁଖ୍ୟମନ୍ତ୍ରୀ ଚାମ୍ପିୟନ ଟ୍ରଫି ଫୁଟବଲ୍ ଟୁର୍ଣ୍ଣାମେଂଟ ମ୍ୟାଚ – ୫

୨-୦ଗୋଲରେ ବୈରାଗୀହାଲୁଆକୁ ହରାଇ କୋଦମା ବିଜେତା
ରାୟଗଡ଼ା ଜିଲ୍ଲା (ଆମ ଓଡିଶା ଖବର )/୧୦/୪() : ରାୟଗଡ଼ାର ସ୍ତାନୀୟ ଜିସିଡି ହାଇସ୍କୁଲ ପଡିଆ ଠାରେ ଗତ ୬ତାରିଖ ଠାରୁ ଆରମ୍ଭ ହୋଇଥିବା ଜିଲ୍ଲାସ୍ତରୀୟ ମୁଖ୍ୟମନ୍ତ୍ରୀ ଆନ୍ତଃଜିଲ୍ଲା ଫୁଟବଲ ଚାମ୍ପିୟନ ଟ୍ରଫି ଟୁର୍ଣ୍ଣାମେଂଟ -୨୦୨୫ର ମ୍ୟାଚ ନମ୍ବର ୫ରେ ଆଜି ବୈରାଗୀହାଲୁଆ ଟିମକୁ ହରାଇ ଗୁଡାରୀ ବ୍ଳକ କୋଦମା ଟିମ୍ ବିଜେତା ହୋଇଛି । ବୈରାଗୀହାଲୁଆ ଟିମକୁ ୨-୦ଗୋଲରେ ପରାସ୍ତ କରି କୋଦମା ଟିମ୍ ବିଜେତା ହୋଇଛି । ଜିଲ୍ଲା କ୍ରୀଡା ଅଧିକାରୀ ଶେଖ୍ ଅଲିନୁରଙ୍କ ତତ୍ୱାବଧାନରେ ଆୟୋଜିତ ଏହି ଟୁର୍ଣ୍ଣାମେଂଟର ଆଜିର ଏହି ଲିଗ୍ ମ୍ୟାଚକୁ ସୂଚନା ଓ ଲୋକ ସଂପର୍କ ବିଭାଗ ଉପନିର୍ଦ୍ଦେଶକ ତଥା ଜିଲ୍ଲା ସୂଚନା ଓ ଲୋକ ସଂପର୍କ ଅଧିକାରୀ ବସନ୍ତ କୁମାର ପ୍ରଧାନ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ସମ୍ମାନୀତ ଅତିଥି ଭାବେ ସାମ୍ବାଦିକ ଶିବ ନାରାୟଣ ଗଉଡ ଯୋଗ ଦେଇ ଖେଳାଳୀମାନଙ୍କୁ ଉତ୍ସାହିତ କରିଥିବା ବେଳେ ଶ୍ରୀ ପ୍ରଧାନ ଖେଳୁଆଡ ମନୋଭାବ ରଖି ସମସ୍ତ ଖେଳାଳୀ ଖେଳିବା ଆବଶ୍ୟକ ବୋଲି କହିଥିଲେ । ସେହିପରି ଜିଲ୍ଲା କ୍ରୀଡା ଅଧିକାରୀ ଶ୍ରୀ ଅଲିନୁର ଟୁର୍ଣ୍ଣାମେଂଟର କାର୍ଯ୍ୟସୂଚୀ ଉପରେ ଆଲୋକପାତ କରିଥିଲେ । ଆସନ୍ତା ଏପ୍ରିଲ୍ ୧୫ତାରିଖରେ ଏହି ଟୁର୍ଣ୍ଣାମେଂଟର ଫାଇନାଲ ମ୍ୟାଚ ଅନୁଷ୍ଠିତ ହେବାକୁ ଥିବା ବେଳେ ୩ଟି ଫୁଟବଲ କ୍ଳବ ସମେତ ୫ଟି ହାଇସ୍କୁଲ ଟିମ୍ ମୋଟ ୮ଟି ଦଳ ଏଥିରେ ଅଂଶଗ୍ରହଣ କରିଛନ୍ତି । ଗ୍ରୁପ୍ ଏ’ରେ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ବୈରାଗୀହାଲୁଆ,ମା ମଝିଘରିଆଣୀ ଫୁଟବଲ କ୍ଳବ,ରାୟଗଡ଼ା,ସରକାରୀ ହାଇସ୍କୁଲ,କୋଦମା,ଗୁଡାରୀ ଓ ଗୋପବନ୍ଧୁ ମ୍ୟୁନିସିପାଲଟି ହାଇସ୍କୁଲ ,ରାୟଗଡ଼ା ଟିମ ରହିଥିବା ବେଳେ ଗ୍ରୁପ୍ ବି’ରେ ଇଏଆରସି,ଶିରିଗୁଡା,ରାୟଗଡ଼ା,ଟାଉନ ଫୁଟବଲ କ୍ଳବ,ରାୟଗଡ଼ା,ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ,ହାଲୁଆ ଏବଂ ବିଷମକଟକ ସରକାରୀ ହାଇସ୍କୁଲ ଟିମ୍ ରହିଛନ୍ତି । ୧୫ବର୍ଷରୁ କମ ଏହି ଫୁଟବଲ ଟୁର୍ଣ୍ଣାମେଂଟରେ ଯେଉଁ ଦଳ ବିଜେତା ହେବ ରାଜ୍ୟସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରିବେ ବୋଲି ଜିଲ୍ଲା କ୍ରୀଡା ଅଧିକାରୀ ଶ୍ରୀ ଅଲିନୁର କହିଛନ୍ତି ।

ରାୟଗଡା ରୁ ଜିଲ୍ଲା ପ୍ରତିନିଧି ଅଜିତ କୁମାର ଭାତ୍ରା ଙ୍କ ରିପୋର୍ଟ ଆମ ଓଡିଶା ଖବର।