ରାସ୍ତା କଡ଼ରୁ ଯୁବକଙ୍କ  ଖୁଲାନ୍ତ ମୃତ ଦେହ ଉଦ୍ଧାର । ଆତ୍ମ ହତ୍ୟା ସନ୍ଦେହ ।

ଧର୍ମଗଡ:୧୨/୨ ( ଆମ ଓଡ଼ିଶା ଖବର)  ଧର୍ମଗଡ ବ୍ଲକ୍ କଦଳୀମୁଣ୍ଡା ଛକ ପ୍ରଧାନମନ୍ତ୍ରୀ ରାସ୍ତା କଡ଼ ଏକ ଗଛରେ ଜଣେ ଯୁବକଙ୍କ ଝୁଲନ୍ତା ମୃତ ଦେହ ଠାବ ହୋଇଛି । ମୃତ ବ୍ୟକ୍ତି ଜଣକ କୋକସରା ଥାନା ଅଧୀନ ପଲସପାଣି ଗ୍ରାମର ରାଧେ ପୁଝାରୀ( ୪୦) ବୋଲି ଜଣାପଡିଛି । ସୂଚନା ମତେ ମୃତ ବ୍ୟକ୍ତି ଜଣକ ରବିବାର ଭୋର ସକାଳୁ ଘରୁ ବାହାରି ଫେରି ନ ଥିଲେ । ତେବେ ସେହିଦିନ ସନ୍ଧ୍ୟା ପ୍ରାୟ ୫ଘଣ୍ଟା ସମୟରେ କଦଳୀମୁଣ୍ଡା ଛକ ପ୍ରଧାନ ମନ୍ତ୍ରୀ ରାସ୍ତା କଡ ଏକ ଗଛରେ ତାଙ୍କ ଝୁଲନ୍ତା ମୃତ ଦେହ ଦେଖିବାକୁ ମିଳିଥିଲା  । ତେବେ ମୃତ୍ୟୁ ର କାରଣ ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଥିବା ବେଳେ ଯୁବକ ଜଣକ ଏକ  ପ୍ଲାଷ୍ଟିକ ବସ୍ତା ଦଉଡ଼ି ବେକରେ ଦେଇ ଆତ୍ମ ହତ୍ୟା କରିଥିବା ସନ୍ଦେହ କରାଯାଉଛି । ମୃତ ଯୁବକଙ୍କ କିଛି ଦିନ ହେବ ମାନସିକ ସ୍ଥିତି ଠିକ୍ ନଥିବା ପ୍ରକାଶ କରିଛନ୍ତି ପରିବାର ଲୋକେ । ତାଙ୍କ ୫ଟି ଝିଅ ,ସ୍ତ୍ରୀ ଓ ବୃଦ୍ଧ ମା ରହିଛନ୍ତି ।ଖବର ପାଇ ପରିବାର ଲୋକେ ଘଟଣା ସ୍ଥଳ ପହଞ୍ଚି ଧର୍ମଗଡ଼ ପୋଲିସ କୁ ଜଣାଇଥିଲେ । ଧର୍ମଗଡ ପୋଲିସ ଘଟଣା ସ୍ଥଳ ପହଞ୍ଚି ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ଧର୍ମଗଡ଼ ଡାକ୍ତରଖାନା ପଠାଇ ଅଧିକ ତଦନ୍ତ ଜାରି ରଖିଛି । ତଦନ୍ତ ପରେ ହିଁ ମୃତ୍ୟୁ ର କାରଣ ଜଣାପଡିବ ବୋଲି ଧର୍ମଗଡ଼ ପୋଲିସ ପ୍ରକାଶ କରିଛି ।