ବାଇକ୍ ଧକ୍କାରେ ବୃଦ୍ଧା ମୃତ ।

ଧର୍ମଗଡ଼: କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଲକ କେଗାଁ ଠାରେ ଏକ ବାଇକ ଧକ୍କାରେ ଜଣେ ବୃଦ୍ଧାଙ୍କ ମୃତ୍ୟୁ ହୋଇଛି । ମୃତ ବୃଦ୍ଧା ଜଣକ ସାନଚେରଗାଁ ଗ୍ରାମର ମଦନା ମାଝି (୬୫) ବୋଲି ଜଣା ପଡିଛି । ସୂଚନା ମତେ ସେ କୌଣସି କାମରେ କେଗାଁ ଆସୁଥିବା ବେଳେ କେଗାଁ ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟ ସମ୍ମୁଖରେ ସ୍ଥାନୀୟ ସାନଚେରଗାଁ ଦେଶୀ ମଦ ଭାଟିର ଜଣେ କର୍ମଚାରୀ ଏକ ବାଇକ ଯୋଗେ ଆସୁଥିବା ସମୟରେ ବୃଦ୍ଧାଙ୍କୁ ଧକ୍କା ଦେଇଥିଲା । ଏପରିକି ବୃଦ୍ଧା ଜଣକ  କିଛି ଦୂର ବାଇକରେ ଘୋଷାଡୀ ହୋଇ ଯାଇଥିଲେ । ଫଳରେ ବୃଦ୍ଧାଙ୍କ ମୁଣ୍ଡ ହାତ ଓ ଗୋଡ଼ରେ ଗଭୀର ଆଘାତ ହେବା ସହିତ ପ୍ରଚୁର ରକ୍ତସ୍ରାବ ହୋଇ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ଦୁର୍ଘଟଣା ଘଟାଇ ବାଇକ ଛାଡି ମଦ ଭାଟି କର୍ମଚାରୀ  ଫେରାର ମାରିଥିବା ବେଳେ ଘଟଣା ସ୍ଥଳରେ ଉତ୍ତେଜନା ପ୍ରକାଶ ପାଇଥିଲା । ଉକ୍ତ ଭାଟି କର୍ମଚାରୀକୁ ଗିରଫ କରିବା ସହିତ କ୍ଷତିପୂରଣ ଦାବିରେ ପରିବାର ଓ ସ୍ଥାନୀୟ ଲୋକେ ରାସ୍ତା ଅବରୋଧ କରିଥିଲେ । କେଗାଁ ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ମଧ୍ୟ କୌଣସି ସୁଫଳ ମିଳିପାରି ନଥିଲା । ଦୁର୍ଘଟଣା ଘଟାଇ ଥିବା  କର୍ମଚାରୀକୁ ପୋଲିସ ଗିରଫ କରିବା ସହିତ ସମ୍ପୃକ୍ତ ମଦ ଭାଟି ପକ୍ଷରୁ କ୍ଷତିପୂରଣ ଦେବା ପରେ ଦୀର୍ଘ ୫ ଘଣ୍ଟା ପରେ ରାସ୍ତା ଅବରୋଧ ହଟିଥିଲା । ଧର୍ମଗଡ଼ ଡାକ୍ତର ଖାନାରେ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ଜଣାପଡିଛି । କେଗାଁ ଥାନା କେସ ନମ୍ବର ୧୩୯/୨୦୨୩ ରେ ଏକ ମାମଲା ରୁଜୁ ହୋଇଥିବା ବେଳେ ବାଇକ୍ ଚାଳକ କୁ ଗିରଫ କରି  ତଦନ୍ତ ଜାରି ରହିଥିବା ସୂଚନା ଦେଇଛି ପୋଲିସ ।