ଯୁକ୍ତ ଦୁଇ ପରୀକ୍ଷାରେ ଶତ ପ୍ରତିଶତ ସଫଳତା ହାସଲ କଲା ନବଘନ ନାୟକ ଡିଗ୍ରୀ କଲେଜ l

ବସୁମତୀ ଜେନା ବ୍ଲକ ଟପ୍ପର, ରିଙ୍କି ନାହାକ ଦ୍ୱିତୀୟ ସ୍ଥାନ 

ରିପୋର୍ଟ :ଦେବାଶିଷ 

ବେଗୁନିଆପଡା(ଆମ ଓଡ଼ିଶା ଖବର )ଚଳିତ ମାସ 26 ତାରିଖରେ ପ୍ରକାଶ ପାଇଥିବା ଚଳିତ ବର୍ଷର ଯୁକ୍ତ ଦୁଇ ପରୀକ୍ଷା ଫଳରେ ସଫଳତାର ଶୀର୍ଷ ଛୁଇଁଛି ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ଅନ୍ତର୍ଗତ ପି.ନୂଆଗାଁ ସ୍ଥିତ ନବଘନ ନାୟକ ଡିଗ୍ରୀ କଲେଜ | ସୂଚନା ଅନୁଯାୟୀ ଉକ୍ତ ମହା ବିଦ୍ୟାଳୟର 107 ଜଣ ଛାତ୍ର ଛାତ୍ରୀ ଯୁକ୍ତ ଦୁଇ ପରୀକ୍ଷା ଦେଇଥିବା ବେଳେ ସମସ୍ତ ଛାତ୍ର ଛାତ୍ରୀ ସଫଳତାର ସହିତ କୃତକାର୍ଯ୍ୟ ହୋଇଛନ୍ତି |

ସେଥି 79 ଜଣ ପ୍ରଥମ ଶ୍ରେଣୀ,24 ଜଣ ଦ୍ୱିତୀୟ ଶ୍ରେଣୀ ଓ 4 ଜଣ ତୃତୀୟ ଶ୍ରେଣୀରେ ଉତ୍ତୀର୍ଣ ହୋଇଥିବା ବେଳେ ବସୁମତୀ ଜେନା 517 ନମ୍ବର ରଖି ବେଗୁନିଆପଡା ବ୍ଲକରେ ଟପ୍ପର ହେବାର ସୌଭାଗ୍ୟ ଅର୍ଜନ କରିଛନ୍ତି | ସେହିଭଳି ରିଙ୍କି ନାହାକ (516) ଦ୍ୱିତୀୟ ସ୍ଥାନ ହାସଲ କରିଥିବା ବେଳେ ଅନିତା ସାହୁ (507), ଅମ୍ବିକା ରାଣା (507) ପ୍ରମୁଖ ତୃତୀୟ ସ୍ଥାନ ଅଧିକାର କରିଛନ୍ତି | ସେଥି ମଧ୍ୟରୁ 28 ଜଣ ଛାତ୍ର ଛାତ୍ରୀ 80 ପ୍ରତିଶତ ମାର୍କ ରଖି କଲେଜର ନାମକୁ ରୋଶନ କରିଛନ୍ତି |

ଛାତ୍ର ଛାତ୍ରୀ ମାନଙ୍କ ସଫଳତାକୁ ନେଇ ବେଶ ଖୁସି ବ୍ୟକ୍ତ କରିଛନ୍ତି ଏହି ମହା ବିଦ୍ୟାଳୟର ପ୍ରତିଷ୍ଠାତା ତ୍ରିନାଥ ନାହାକ ଙ୍କ ସମେତ କଲେଜ ଅଧ୍ୟକ୍ଷା ପୂଜା ମହାପାତ୍ର ଏଵଂ ଅନ୍ୟ ଅଧ୍ୟାପକ ଓ ଅଧ୍ୟାପିକା | ଦୀର୍ଘ ଚାରି ବର୍ଷ ଧରି ଏହି କଲେଜ ଶତ ପ୍ରତିଶତ ସଫଳତା ହାସଲ କରୁଥିବାରୁ ଏହି ଶିକ୍ଷା ଅନୁଷ୍ଠାନରେ ପିଲାମାନେ ସ୍ଵେଛାକୃତ ଭାବେ ଏଠି ନିଜ ନାମ ଲେଖିବାକୁ ଆଗ୍ରହ ପ୍ରକାଶ କରୁଥିବାର ମଧ୍ୟ ଦେଖିବାକୁ ମିଳିଛି | ଏହି ସଫଳତାକୁ ନେଇ ଅଭିଭାବକ ମହଲରେ ମଧ୍ୟ ବେଶ ଉତ୍ସାହ ପରିଲିକ୍ଷିତ ହୋଇଛି |