ବିଳମ୍ବିତ ରାତିରେ ଗ୍ରିଲ ତାଲା ଭାଙ୍ଗି ଲକ୍ଷାଧିକ ଟଙ୍କା ସମେତ ସୁନା ଚୋରୀ  l

ରିପୋର୍ଟ :ଦେବାଶିଷ 

ବେଗୁନିଆପଡା, (ଆମ ଓଡ଼ିଶା ଖବର ):ଗଞ୍ଜାମ ଜିଲ୍ଲା ବେଗୁନିଆପଡା ଥାନା ଅନ୍ତର୍ଗତ ବିରୁଝୁରି ପଞ୍ଚାୟତର ପି.ନୂଆଗାଁ ରେ ରବିବାର ବିଳମ୍ବିତ ରାତିରେ କବାଟ, ଗ୍ରିଲ ଭାଙ୍ଗି ଆଲମାରୀ ରୁ ଲକ୍ଷାଧିକ ଟଙ୍କା ସହିତ ଲାପଟପ, ସୁନା ଜିନିଷ ଚୋରୀ ହୋଇଥିବା ଅଭିଯୋଗ ଆସିଛି | ଉକ୍ତ ଗ୍ରାମର ସୁଦର୍ଶନ ଜେନା,ତାଙ୍କ ସାନ ଭାଇ ପରିବାର ସହିତ ମିଶି ନିଜ ଦାଣ୍ଡ ଘରେ ସୋଇଥିବା ବେଳେ ରାତି ପ୍ରାୟ ଗୋଟାଏ ସମୟରେ ଦୁର୍ବୁର୍ତ୍ତ ମାନେ ଘର ବାରି ପଟୁ ଆସି ଗ୍ରିଲ ର ତାଲା ଭାଙ୍ଗିବା ସହ ଅନ୍ୟ ଏକ କବାଟକୁ କଣା କରି ଘର ଭିତରକୁ ପଶିଥିଲେ | ଘର ଭିତରେ ଥିବା ଗଡ଼ରେଜକୁ ଖୋଲି ଲକ୍ଷାଧିକ ଟଙ୍କା ସମେତ ଲାପଟପ ଓ ସୁନା ଜିନିଷ ନେଇ ପଳେଇ ଯାଇଥିଲେ | ଏକ କ୍ୟାମେରାକୁ ମଧ୍ୟ ଭାଙ୍ଗି ଦେଇ ଫୋପାଡ଼ି ଦେଇଥିଲେ | ଆଲମାରୀରେ ଥିବା ଲୁଗାପଟାକୁ ମଧ୍ୟ ଏଣେତେଣେ ଫିଙ୍ଗି ଦେଇ ବାରି ପଟ ଦେଇ ଦୁର୍ବୁର୍ତ୍ତ ମାନେ ପଳେଇ ଯାଇଥିବା ଅଭିଯୋଗ ହୋଇଛି | ସୂଚନା ପ୍ରକାରେ ସୁଦର୍ଶନଙ୍କ ଦୁଇ ଘର ଛାଡି ଅନ୍ୟ ଏକ ଘରର କବାଟରେ କଣା କରି ଚୋରୀ କରିବାକୁ ଉଦ୍ୟମ କରିଥିବା ବେଳେ ଘର ମାଲିକ ଉଠି ଯିବାରୁ ଚୋର ସେହି ଘରୁ ଚୋରୀ କରିବାରେ ଅସଫଳ ହୋଇଥିଲେ | ସୁଦର୍ଶନ ଙ୍କ ପତ୍ନୀଙ୍କ କହିବା ପ୍ରକାରେ ସେ ଯେତେବେଳେ ବିଞ୍ଚଣାରୁ ଉଠିଥିଲେ ତାଙ୍କ ମୁଣ୍ଡ ବୁଲେଇ ହେବା ସହ ପଡିଯାଇଥିଲେ | ତେଣୁ ଚୋର କିଛି ରାସାୟନିକ ପଦାର୍ଥ ବ୍ୟବହାର କରିଥିବା ବି ଅନୁମାନ କରାଯାଉଛି | ଅନ୍ୟପଟେ ସ୍ଥାନୀୟ ଅଞ୍ଚଳରେ ମାତ୍ରାଧିକ ଚୋରା ଦେଶୀ ମଦ ବିକ୍ରି ସାଙ୍ଗକୁ ଜୁଆ ଖେଳ ଚାଲୁଥିବାରୁ ଏଭଳି ଘଟଣା ଘଟୁଥିବା କହିଛନ୍ତି ଉକ୍ତ ପଞ୍ଚାୟତର ପୂର୍ବତନ ସମିତିସଭ୍ୟ ବିନାୟକ ନାୟକ | ତେବେ ଏ ନେଇ ବେଗୁନିଆପଡା ଥାନାରେ ଲିଖିତ ଅଭିଯୋଗ ପରେ ଥାନା ଆଇଆଇସି ଅଶୋକ କୁମାର ହାଂସଦ, ଏସଆଇ ଟୁନା ପୀଡ଼ିକା ଘଟଣା ସ୍ଥଳରେ ପହଞ୍ଚି ତନାଘନା କରିବା ସହିତ ଥାନା କେଶ ନମ୍ବର 309/24 ରେ ଏକ ମାମଲା ରୁଜୁ କରି ତଦନ୍ତ ଚଳାଇଛନ୍ତି |